مانی ئاویەر –
ئەو گۆرانكاریانە كە هەنووكە لە توركیە و باكووری كوردستان لە ئارادایە، دوو ئەنجام لە گەڵ خۆی دێنێت. یەك: بۆ گەلی كورد و پێكهاتەكانی دیكەی توركیە كە باوەڕیان بە خۆبەڕێوەبەری دیمۆكراتیكی كۆمەڵگا هەیە، قۆناخێكی درەوشاوە و پڕ لە بەختەوەری و هیوایە، دوو: بۆ دەسەڵات داران و بیرۆكەی بەرتەسك و شەڕانگێزیان قۆناخێكی پڕ لە هەڵدێر و دۆڕاندن و روو ڕەشی دەبێت.
یەك لە تایبەتمەندیەكانی دەسەڵاتداران و بیرۆكەی چەقبەستوویان، ئەوەیە كە، لە بەرانبەری نوێبوونەوە و گۆڕانكاریدا بێویستن و پێداگیرن لە سەر دووبارە بوونەوە و لاسایی كردنەوە! بێگومان ئەم تایبەتمەندیە وەك ژاری ئەژدیها بە درێژای مێژوو، شادەمارەكانی بارەگا و باڵەخانەكانی داڕزاندووە و پووكاندووە! ئەگەر لە دۆخی هەنووكەی پارتی دەسەڵاتدار لە توركیا واتەAKP ورد بینەوە، بە باشی هەست بەم كارەساتە دەكرێت.
AKP دەیەوێت جارێكی دیكە ئیمپراتۆری سەردەمی عوسمانیەكان دابمەزرێنێت. وەك دەزانرێت لە سەردەمی عوسمانیەكاندا یەك رۆژ لە حەوتەیان بۆ گەل تەرخان دەكرد. ئەوە راستییەكی بە بەڵگەیە كە ئەو سەردانانە نە بۆ هەموو گەل بوو، بەڵكوو بو ئەو توێژو كەسانە بوو كە وەك ئیمپراتۆری بچووك دەوریان دەگێڕا لە پاراستنی دەسەڵاتی عوسمانیەكان. لە هەمان كاتیشدا وەك هەلێك بەكار دەهێنرا بۆ نواندنی دەسەڵات و هێزی ئیمپراتۆری. واتا رەچاوكردنی داواكاری و داخوازی و ئازارەكانی كۆمەڵگا لە ئارادا نەبووە. ئێستاش هەمان كۆشك و باڵەخانە، لە لایەن AKP وە بەرز كراوەتەوە و لە حەوتەیەكدا، رۆژێكیان بۆ سەردانی خەڵك تەرخان كردووە. لێرەدتا یەك خاڵی جیاواز دەبینرێت، ئەویش ئەوەیە كە ئەو سەردانانە نە تەنیا بە هەمان مەبەستی سەردەمی عوسمانیەكان، بەڵكوو بۆ پیشاندانی دەسەڵاتی AKP یە كە چاوی خەڵكی تێر بكات و ئاوەها نیشان بدات كە ئەم كۆشكە، هەتا هەتاییە و رووخانی بۆ نیە. هەروەها كەش و هەوایكی تۆقێنەر بۆ ئەو كەسایەتی و لایەنانە درۆست بكات كە بە پێچەوانەی ئەوان بیر دەكەنەوە. هەڵەی بنەڕەتی دەسەڵاتی AKP ئەوەیە كە ئەو راستینە مێژووییە نابینێت و دەیەوێت، پێشكەوتنەكانی هێڵی ئازادی بە ئاراستەیەكی چەواشە كارانەدا ببات. بەڵام داخۆ دەگات بە خەیاڵە پیس و نامرۆڤانەكەی؟. یان دەكەوێتە نێو زبڵدانی مێژووەوە؟ یان پەنجەی خۆی دەگەزێت؟.
هاوكات لەگەڵ ئەم پیلانگێڕیانە، ئەو بەشەی لە گەلی توركیا كە تینووی ئازادیە، بەگشتی و گەلی كورد لە باكووری وڵات بەتایبەت، سوورن لە سەر داخوازیە رەواكانیان و لە هەر قۆناخێكدا، هەوڵدانیان ئەوە بوو و ئەوەیە كە پەرە بە تێكۆشان و چالاكی و رێكخستنی خۆیان بدەن.
بە زمانی شیاو و روون هەوڵدان كراوە كە دەسەڵات تێبگەینن كە ئەوەیكە هەتا هەتا دەمێنێتەوە «بڕیاری ئازاد ژیان كردنی گەلانە» نە قیت مانەوەی كۆڵكەی كۆشكەكان!
جێی ئاماژەیە، كە رێبەر ئاپۆ لە نەورۆزی ساڵی 2013 جارێكی دیكە و لە پەیامێكی مێژووییدا، بانگی لە هەركەس كرد كە بۆ سەرخستنی پرۆسەی ئاشتی، هەموو هەوڵی خۆیان بخەنە گەڕ و چی لە دەستیان دێت ئەنجامی بدەن.
هەڵە و گەمژەیی دەوڵەتی توركیا ئەوە بوو كە وەڵامی ئەو پەیام و هەوڵە دیمۆكراتیك خوازانەی رێبەر ئاپۆ و گەلی كوردی بە بەخێو كردن و پشتیوانی كردنی چەتەكانی داعش دایەوە.
واتا قۆناخی ئاگر بەست و بێدەنگ كردنی چەكەكانی بزاڤی رزگاریخوازی گەلی كوردی، بۆ بەرژەوەندییەكانی خۆی بەكارهێناو و لە جێگای هەنگاو هەڵهێنان بۆ دیمۆكراتیزە كردنی توركیا پێداگیر بوو لە سەر سەپاندنی سیاسەتی بێ بەرهەمی خۆی، كە حاشا كردن و لە ناوبردنە.واتا ئەو تەنیا دژبەری دیمۆكراتیك بوونی توركیا نییە، بەڵكوو دژی رەواڵی كائینات و راستی سروشتە. بۆ ئەم هەڵە و نەزانكاریانەی، پێویستە دەست لە ئەژنۆ دانیشێت و لێژایی ئەو رێگایە ببینێت كە خۆی ئەندازیاری بووە!
راستییەكی حاشا هەڵنەگرە كە ئیتر چی دیواری بەندیخانەكان، هەر چەشنە سنووری دەستكرد، هەڕەشە و گوڕشەی نەیاران، سیاسەتی نەرمە بڕی هەلپەرەستان و زەرق و بەرقی جیهانی سەرمایەداری، ناتوانێت جەوانانی كورد لەو ئەركەیان، كە پاراستنی كۆمەڵگایە، دوور بخاتەوە و بێ گاریگەریان بكات. ناتوانێت لە رەوڵی نژیار (بەنا) بوونیان لە دامەزراندنی كۆمەڵگایەكی خۆبەڕێوەبەر، پەراوێزیان بخات. ناتوانێت دزە بكاتە ناو ئەو یەكینە و یەك هەڵوێستییەی كە جەوانانی كورد بە مەبەستی پاراستنی نرخە پیروزەكانی كۆمەڵگا پێكەوەیان ناوە.
ئەمانە دروشم نیین. ئەمانە راستین كە لە گەڵ ماتەوزەی جەوانان ئاوێتە بووە و ڕای گشتی جیهان و مرۆڤایەتی بۆ لای خۆی راكێشاوە. جەوانان لەو باوەڕەدا ژیان دەكەن كە ئەم قۆناخە، هەڵوێستی رادیكاڵ، كردارێكی بێ وچان، رێكخستنێكی زانستیانە، خۆپەروەردە كردنی جەوهەری و شرۆڤەیەكی راستەقینە و ئەقڵێكی ئافرێنەر دەتوانێت خولیاكانیان بە كرداری بكات. بێگۆمان ئەم تایبەتمەندیانە لە فەلسەفەی رێبەر ئاپۆدا بەدی دەكرێت.هەنووكەش دەبینین لە شۆڕشی باكووردا خۆی دەنوێنێت.
جەوانان هەموو كاتێك وتوویانە كە ئامادەن بۆ پێشەنگایەتی ئافراندنی كۆمەڵگای ئازاد و شیاوی ژیان، هاوكاتیش بێ ترس و دڵەڕاوكێ، بۆ پاراستن و بەرپەرچدانەوەی هەر چەشنە هێرش و مەتەرسی و رووداوێكی نەخوازراو، وەك فیداییەك ئامادەن. جەوانان دوای نەورۆزی 2013 لە ماوەی ئاگربەستدا، لە سەر سێ خاڵ ڕاوەستەیان كرد و خۆیان ئامادە كرد.
یەكەم: خۆپەروەردە كردن و بەرز كردنەوەی ئاستی هۆشیاری كۆمەڵگا لە سەر ئەم بنەمایە.
لەم ماوەدا رێنمایەكانی «رێبەر ئاپۆ»یان بە دڵ و گیان لە سەر دامەزراندی ئاكادێمیای جەوانان بە هەند وەرگرتو و بە دەیان ئاكادیمیا و بە سەدان خولی راهێنانیان بە سەركەوتوویی بەڕێوەبرد. پەرگالێكیان ئاوا كرد كە زۆرینەی جەوانان بتوانن لە نیویدا خۆیان ببینەوە.
دووهەم: خۆ پێشخستن لە سەر بنەمای پاراستنی رەوا. لە بواری تیۆری و تاكتیك و ئامادەكاری، چەك و ئەو کەرەستە و ئامێرانەی كە بۆ شەڕی گەلی شۆڕشگێری پێویستە، خۆیان راهێنا و ئامادەكاری باشیان كرد. لە بەر ئەوەی شیمانەیان دەكرد كە دەوڵەتی توركیا هەنگاو هەڵنەگرێت.
سێهەم: خاوەنداری كردن لە شۆڕشی بەشەكانی دیكە بەتایبەت رۆژئاوای كوردستان و بەشداری كردن لە سیاسەتی دیمۆكراسی خوازانە لە توركیا و باكووری وڵات. بەزاندنی ئەو سنوورەی كە لە نێوان باكوور و رۆژئاوا، بەشداربوونی بە لێشاو بۆ بەرخۆدانی كۆبانێ و هەروەها بەشداربوون لە كار و خەباتی پارتی دیمۆكراتیكی گەلان( HDP) نموونەی بەرچاوی ئەم قۆناخە بوون.
جەوانان لەو باوەڕەدان كە سێ چەمك پێویستە سەروەر بكرێت كە بە پێچەوانەی چەمكەكانی هەیی توركیە و ناوچەكەیە.
یەكەم: پێویستە بە هیچ شێوازێك و لە هیچ كاتێكدا چاوەڕوانی ئەوە نەكرێت كە دەسەڵات دادپەروەر بێت و بە هانای قەیرانەكانی كۆمەڵگاوە بڕوات.
دووەم: چاوەڕوانی ئەوە نەكرێت كە هێزە سیاسیە دەرەكیەكان، رێگە خۆشكەر بن بۆ دەستپێكردنی شۆڕش، واتا پشت بەستن بە هێزی جەوهەری كۆمەڵگا بە بنەما بگیردرێت.
سێهەم: خەباتی ئاواكردنی كۆمین و مەجلیس و دەسپێكردنی ئەو چەشنە خەباتانە شان بە شانی شەڕی پاراستن. دەتوانین بڵێین ئەو شەڕە، شەڕی گەلی شۆڕشگێرە نە شەڕی نێوان دەوڵەت و لایەنێكی چەكدار بە واتای كلاسیك.
لێرەدا دەمەوێت جەخت لە سەر ئەوە بكەمەوە كە ئەو پێشەنگایەتیە كە جەوانان لە توركیا و باكووری وڵات بەڕێوەی دەبن، چون دەستی پێكردووە، هاوكاتیش گاریگەری لە سەر بەشەكانی دیكەی ناوچەكە چییە و رۆڵی جەوانانی بەشەكانی دیكەی كوردستان لەم مژارەدا چون دەبێت و چییە؟
شەڕی گەلی شۆڕشگێڕی لە سێ خاڵدا جیاوازی خۆی لە گەڵ شەڕەكانی دیكەدا ئاشكرا دەكات.
كە بریتین لە یەكەم: وەك بیرۆكە و چەمك، چەمكی دیمۆكراسی رادیكاڵ بۆ خۆی بە بنەما دەگرێت.
دووەم: هەموو تاكێكی كۆمەڵگا لە شۆڕشدا دەوریان هەیە و بەشدار دەبن و كەس پەراوێز نامێنێت و ناخرێت.
سێهەم: مەبەست لەناوبردنی لایەن، هێز، رەنگ و نەتەوەیەك نییە. بەڵكوو ئاوا كردنی پەرگاڵ و كۆمەڵگایەكە كە هەموو نەتەوە، رەنگ و باوەرێك خۆیان تێدا دەبیننەوە. فەرە رەنگ بوون و پڕ نەتەوە بوون، نیشانەی دەوڵەمەند بوونە و وەك نرخی پیرۆز پێناسە دەكرێت، نە وەك كۆسپ و لەمپەر لە پرۆسەی ئازادیدا.
جەوانان دوای پەیامی نەورۆزی 2013 ی رێبەر ئاپۆ، خۆیان لە دوو بەشدا و بە شێوازێكی شاراوە بەڵام بەرفەراوان بە رێكخستن كرد.
یەكەم: لە چوارچێوەی حەرەكەتی جەوانانی وڵاتپارێز و شۆڕشگێڕ(YDGH). هاوكات وەك ژنانی جەوانیش، لە سەر ناوی YDGK واتا ژنانی جەوانی وڵاتپارێز و شۆڕشگێڕ لە باكووری كوردستان و توركیا، خۆیان بە رێكخستن كرد. جێی ئاماژەیە كە خاوەندارانی بیر تەسك و بێ ئیرادە و لیبراڵ، ئاوەهایان دەگوت كە چون دەبێت كە جەوانان لە بەرانبەر NATO كە لە بواری كەل وپەلی لەشكەریدا لە ئاستی جیهان قسەی بوو وتن هەیە و لە لوتكەدایە، شەڕ بكەن و سەر بكەون؟ لێرەدا پێویستە كە بێژین، باش بزانن كە»هیچ هێز وتكنۆلۆژیایەك ناتوانێت بە سەر توانا و ئیرادەی مرۆڤدا زاڵ بێت».
جەوانانیش هێزی مرۆڤایەتی بە بنەما دەگرن، بۆیە دڵنیان لە سەركەوتن. ئەوەیكە كۆڵ بە NATO و شەڕە تایبەتەكانی دەدات، ئیرادەی پتەو و بڕیاری رادیكاڵە كە هەر دوو لەو دوو بزاڤە ئاماژە پێكراوەدا بە باشی بەدی دەكرێت. دەوڵەتی توركیا بە وەگەڕخستنی ژیتەمێكی (ڕێکخراوی ئیتلاعاتی) نوێ لە سەر ناوی (جوانانی حزب اللە) كە كت و متی داعشە، ئەوەی كە لە دەستی هات دژ بە جەوانان و رێكخستنی ئاماژە پێ كراو كردی.
تەنانەت تا ئاستی كوشتن و رفاندن بە شێوازی كرداری نادیار چوو. بەڵام جەوانانی ئاپۆچی بە خۆ پەروەردە كردن و تێكۆشانی زانستیانە تا ئاستێكی بەرچاو ئەو پیلانانەیان پووچەڵ كردەوە.
بەشداری زیاتر لە سێ هەزار جەوان لە هەر دوو رەگەزەكە، لە ماوەی 48 كاتژمێردا بۆ رۆژئاوا و هەر وەها بەشدار بوونی بەرفەراوانی جەوانان بەتایبەت لە نێو زانكۆدا لە ساڵانی 2014/2015 دا بۆ نێو ریزەكانی گەریلا، وەڵامی شیاو و پێویستی دایەوە بە بەخێوكەرانی چەتەكان.
NATO، دەوڵەت و پولیسی تایبەتی تورك بە ساڵانە هەموو هێزی خۆیانیان خستووەتە گەڕ بۆ مەشق و راهێنانی ئەندامەكانیان كە باشترە وەك «چەتە» ناویان لێ بكەین. دەوڵەتی تورك بە راهێنانی نیشانە بەگیرەكان (تەك تیر انداز) و دزەكردنی نێو بنەماڵەكان، ئاواكردنی بنگەی هەواڵگری و لەشكەری و سیخوریەكان، گرینگی دەدا و پارەی بۆ ترخان دەكرد. ئاوەهای خەیاڵ دەكرد كە لە كردەوە قیزەوەنەكانیدا سەر دەكەوێت.
بەڵام لە كوڵان و كون و كەلەوەرەكانی باكووردا دەبینرێت كە بە راكێشانی پردەیەك لە نیو گەرەكەكاندا، NATO و دەوڵەتی تورك وچەتەكانی ئەردوغان لە مژاری نیشان گراندا كۆڵیان دا و حەپەسانەوە. بە وریا كردنەوەی دایكان لە بواری پاراستنی رەوا و بابەتی هۆڤ بوونی دوژمن، ئەوانیش لەم قۆناخەدا رۆڵێكی باشیان گێڕا.
بۆ نموونە، بە دەستەوەرەكانی ساكار وەك زەنگەن(كلنگ) دەستە بێڵ و تێڵاو … لاقی نەیارانیان لە بەر دركە ماڵاندا هاڕاند و وزەی داگیركەرانیان خستە نێو تەنەكەی زبڵی قۆناخی شەڕی گەلی شۆڕشگێڕیەوە. جەوانان بە هەڵكەندی خەندەق و چاڵمەقووت، تانك و كەل پەلی گولە نەبەڕی NATOیان بێ كاریگەر كرد.
بە دروست كردنی ئەڵغام و تەقەمەنی بە سادەترین كەل و پەل، خەباتی زۆرتر لە یەك دەهەی ئەرتەشی تورك لە مەڕ دروست كردنی كەل وپەل لەشكەری كە بە مەبەستی سەركوت كردنی نارەزایەتییەكانی شار ولادێەكان درووست كرابوو، بە فیرویان دا.
جەوانان بە پڕ كردنی فەردەكان لە خاك و ریزكردنیان لە نێو كوڵانەكاندا هەر بستێكی ئەو كومەڵگایانە كردوەتە مەترەزێك بۆ قوناخی شەڕی گەلی شۆڕشگێڕی. جەوانان شەو و رۆژیان دا بەدەم یەك و سەرهەڵدانیان كردە پیشەی سەركی گەل و خاوێن كردنەوەی وڵاتیان لە نەیاران، وەك تەنیا رێگا هەڵبژاردوە.
لەم قوناخەدا منداڵانیش لە نێو كەش و هەوایەكی شۆڕشدا دەژین و گەمە دەكەن. خوڵەپۆتكێكردنیان دەكەوێتە خزمەتی شۆڕش. واتا ئەوانیش دەیانەوێت وەك خۆیان بژین و خەیاڵە بەرزو و بێ گەردەكانیان كرداری بكەن.
دایكان بوونەتە كۆڵەكەی بنەڕەتی شۆڕش و شانبەشانی جەوانان لە دروست كردنی سەنگەر بگرە تا كۆكردنەوەی زانیاری و زەخت كردن لە سەر كاربەدەستانی دەوڵەت، بگرە تا شروڤەكانیان كە بۆنی ئازادی و ئازایەتی لێ دێت، نەترسانە و رادیكاڵ، پەیامی ئازادی بڵاو دەكەنەوە.
ئەو هوڤیەتیەی كە دەوڵەتی تورك دەیكات بێگومان لە لایەن دەوڵەتانی داگیركەری كوردستان و ئەو هێزە هەرێمیانە كە وەك كۆیلەیەكی خۆبەخش ژیان وسیاسەت دەكەن، پشتیوانی دەكرێت، واتا بێ بەانبەر لە مژاری سەركوت كردنی ئیرادەی گەلان هاوكار و هاوپەیمانی ئیستراتژیكی یەكن. « لە كاسێكی دەكەن و بە كەوچكێك دەیخۆن».
ئەزمونەكانیان لە گەڵ یەك ئاڵوگۆڕ دەكەن و یارەمەتی نیزامی و زانیاری دەدەنە یەك. لە هەمووشان گرینگتر كادیری كارا و شارەزا دەدەنە یەكتر. سەرە ڕای ئەوەی كە داگیركەران و نەیارانی كوردستان مێژووكی پڕ لە ناكۆكی و ئاڵۆزیان پێكەوە هەیە، بەڵام لە مژاری ئازادی و ئیرادەی گەلدا، دەبن بە هەڤاڵبەند و هاوپەیمانی گیانی گیانی یەك. بەتایبەت دەوڵەتی ئێران لەم مژارەدا وەك «گورگی با و باران دیتووی» لێ هاتووە.
واتا خاوەن ئەزموونە و لە رۆژی وەك ئەمڕۆداش لە هیچ كردەوە و كاردانەوەیەك دەستپارێزی ناكات. بەڵام هەتا ئێستاش سەلمێنرا كە ئەوەیكە سەر دەكەوێت و نایدۆڕنێت ئیرادەی گەل و پرۆسەی ئازاد كردنی كۆمەلگَایە بە پێشەنگایەتی جەوانان لە هەر دوو رەگەزەكە.
بە كەڵكە كە ئاماژە بكەین كە تایبەتمەندی كەوانی بە پیت و داوێنەكانی رووباری دیجلە و فورات، ئەوەیە كە لەگەڵ خۆپاراستن و خۆبەڕێوە بردن و پێكەوە ژیان كردنی نەتەوەكاندا نامۆ نیین، بە درێژایی مێژوو، بێ كێشە پێكەوە ژیاون و ناسنامەی یەكیان قەبووڵ كردوە. واتا ئەمە لە سروشتی ئەم ناوچەدا هەیە، بۆیە نەیاران ناتوانن سروشتی ناوچەكە بگۆڕن. ئێران هەنووكە شەڕی خۆی لە دەرەوەی وڵات بەڕێوە دەبات، سیاسەتی قازانج كردنی كات پەیڕەو دەكات و دۆخەكە بە ئاراستەیەكی چەواشەكارانەدا دەبات. بەڵام ئەم رێبازانە پینەیە و چارەسەری بە دواوە نییە. لە ناخ و هەناوی ئەم وڵاتەدا ئەو ماتەوزە شاراوەیە كە بە داگیرساندنی بروسكێك و روون كردنەوەیەكی جەوهەری و دستپێكردنێكی بێ كوشتنی زەمان، دەتوانێت ئەو ماتەوزە بكات بە گڕکان و هەوێنی شۆڕش.
نموونەی بەرچاوی ئەوەیە كە لە ماوەیەكی كەمدا، دوو هێزی YPG و YPJ لە سەر بنەمای پاراستنی رەوا، دامەزاوە و كۆڵیان بە چەتەكانی داعش دا. بێ گۆمان شۆڕشی باكووری كوردستانیش بە پێشەنگایەتی جەوانان، خاڵی ئەساسی و سەركەوتووی ئەوەیە كە، بێ ترس و دڵەڕاوكێ و لە سەر ئەساسی هێزی جەوهەری، دەستی پێكرد. خاڵی جیاواز و سەرنج راكێشی ئەوەیە كە بۆ یەكەم جار پێش هێرشی دۆژمن، جەوانان دەستیان بە شۆڕش كرد.
بۆیە بۆ پووچەڵ كردنەوەی هاوكارییەكانی داگیركەرانی كوردستان و هەڵوەشاندنەوەی هەڤاڵبەندییەكانیان، پێویستە وەك هەموو كاتێك جەوانان ئەركی سەرەكە بگرنە سەر ئەستۆی خۆیان. لە هەموو بەشەكانی كوردستان بە تایبەت باشوور و رۆژهەڵاتی كوردستان و هەروەها ئەو جەوانانەی كە لە هەندەران دەژین، پیویستە كە خاوەنداری لەم قۆناخە بكەن و جەوانان و شۆڕشی باكوری وڵات بە تەنیا نەهێڵن.
بە خۆشحاڵییەوە هەنووكە لە بواری تكنیك و كەرەسەی جیاوازی راگەیاندن و چاپەمەنی، پێشكەوتنێكی بەرچاو هەیە.ئەگەر بە تێر و تەسەلیش نەبێت رووماڵێكی باشی لە روداوەكان لە باكووری وڵات دەكرێت. جەوانان بە بینین و بیستنی ئەو رووداو، و راڤەكردنی قۆناخەكە لە نێو خۆیاندا، هەڵسەنگاندنی مژارەكان و شرۆڤەی وەڵامی ئەو پرسیارە كە دەبێت چی بكەین لە كوێوە دەست پێ بكەین؟ دەتوانن لە بارودۆخی قۆناخەكە ئاگادار ببنەوە، هاوكاتیش رێبازی ژیانی خۆیان بدۆزنەوە و لە كاتێكی كورتدا پێوەست بن بە رێزی شۆڕشگێڕان لە باكووری كوردستان.
باشوور و رۆژهەڵاتی كوردستانیش پێویستیان بە گۆڕانكاری هەیە. واتا لێشا و شەپۆلی شۆڕش ئەو دوو بەشەش دەگرێتەوە و پێویستی بە ئازادكردن و ئاوەدان كردنەوە هەیە. بەشدار بووون جەوانانی رۆژهەڵات و باشوور لە شۆڕشی ئێستای باكوور، دەبێت بە هۆكارێك كە كادری بە ئەزموون و كارا، ئاوا ببێت كە لە داهاتوودا لە شۆڕشی باشوور و رۆژهەڵاتدا تووشی تەنگاو بوون نەبین و هاوكاتیش بتوانین كادیری كارا و شارەزا پەروەردە بكەین.
پێویستە بزانین كە تەنیا رێگامان تێكۆشان و بەرخۆدانە، ئەوەش قەبووڵ بكەین كە داهاتوو بۆ تێكۆشەران دەبێت.