تەقینەوەکانی خانەقین کردەوەیەکی دژە کوردە

تەقینەوەکانی خانەقین کردەوەیەکی دژە کوردە

لە چەند رۆژی رابردوو زەنجیرە تەقینەوەیەک لە شاری خانەقین لە لایەن تیرۆریستەکانی داعشەوە کە گرێدراوی دەوڵەتی تورکیەن روویدا، کە لە ئانجامدا زیاتر لە پەنجا کەس لە هاونیشتمانانمان ژیانی خۆیان لەدەست دا و بە دەیان کەسیش بریندار بوون. چاوخشاندنێک بە بارودۆخی ئەم دوایەی کوردستان ئەوە نیشان دەدات کە ئەم تەقینەوانە بەشێکە لە بازنەی سیاسەتی دژە کورد و بۆیەش پێویست دەکات گەلەکەمان بە هەڵوێستێکی وشیارانەوە برواننە بابەتەکە. ئەم تەقینەوانە لە کاتێکدا پێک دێت کە لەلایەک دەوڵەتی تورک لە سنوورەکانی باکوور و رەژئاوا خەریکی دروست کردنی دیوار و خەندەق هەڵکەندنە، لەلایەکی دیکەشەوە پارتی دموکراتی کوردستانی عێراق لە ئاراستەی هەمان سیاسەتدا خەریکی جیاکردنەوە رۆژئاوا و باشووری کوردستانە و هەروەها لە هەڵکەندنی خەندەقی خیانەت بەردەوامە. ئەم کردەوانە هاوتەریب و هاوکات یەک ئامانجی ئەساسی پەیرەو دەکەن کە بە جگە لە پارچەکردن و ناکۆکی دروستکردن لە نێوان گەلەی کورد شتێکی تر نییە.

هاوکات بڵاوکردنەوەی بەڵگەنامەی دەزگای میتی تورکیە کە لەوێ دا بە بەردەوام کردنی هەڵکەندنی خەندەق، لەناوبردنی رۆحی بەرخۆدانی گەلی کورد و لاواز کردنی یەکێتی نیشتمانی کوردستان لە باشووری کوردستان ئیشارەی پێکراوە، هەروەها نیشاندەری ئەم راستیەیە کە دەوڵەتی تورکیە، تیرۆریستەکانی گرێدراوی ئەم دەوڵەتە و بەشێک لە هێزە کوردیەکان هێرشێکی هەمەلایەنەیان لە دژی ستاتۆی سیاسی هەموو گەلی کورد و بەتایبەت رۆحی شۆرشی گەلەکەمان لە باشووری کوردستان دەستی پێکردووە. بێگومان لە وەها کاتێکدا ئەوەی کە لە هەموو هێزەکانی کورستان و گەلەکەمان چاوەروان دەکرێت یەکگرتوویی و یەکپارچەیی و هەڵوێست گرتنێکی روون و ئاشکرا لەبەرمبەر ئەم کردەوە دژە مرۆیی، تیرۆریستی و دژەکوردەیە.

وەک پارتی ژیانی ئازادی کوردستان ئەم کردەوە تیرۆریستییە لە دژی گەلەکەمان لە خانەقین بە توندی شەرمەزار دەکەین و پرسە و ماتەمینی خۆمان ئاراستەی گەلەکەمان و بەتایبەت گەلی وڵاتپارێزی ئەم شارە و سەرکردایەتی و ئەندامانی یەکێتی نیشتمانی کوردستان دەکەین و هیوای چاک بوونەوە بۆ بریندارەکانیش دەخوازین.

 

کۆردیناسیۆنی پارتی ژیانی ئازادی کوردستان — PJAK
30.04.2014

بابەتی پەیوەندیدار