دەوڵەتی تورک دەستبەجێ داواکاری زیندانیان پەسەند نەکات، دووچاری بەرپرسیارێتی قورستر دەبێتەوە

دەوڵەتی تورک دەستبەجێ داواکاری زیندانیان پەسەند نەکات، دووچاری بەرپرسیارێتی قورستر دەبێتەوە

ماوەی 58 رۆژە ژمارەیەکی زۆر لە زیندانی سیاسیی لە بەندیخانەکانی دەوڵەتی تورکدا، لە باکوری کوردستان و تورکیا بە داوای لابردنی گۆشەگیری سەر رێبەری گەلانی کوردستان رێبەر ئاپۆ، ئازادی بۆ سەرجەم زیندانیانی سیاسی و بە دروشمی (مسۆگەر سەردەکەوین) دەستیان بە مانگرتن لە خواردن کردووە و دەوڵەتی تورکیش وەک پیشەی هەمیشەیی خۆی، لە هەوڵی کپکردنی هەموو دەنگێکی ئازادی و سەرکوتکردنی هەموو راگەیاندنێکدایە، تا بتوانێت سیاسەتی قڕکردنی گەلی کورد و گەلانی تری هەرێمەکە جێبەجێ بکات. ئەمە لە کاتێکدا سیاسەتێکی هۆڤانەیە کە لە دژی مرۆڤایەتی بەڕێوەی دەبەن، لە هەمانکاتدا هەڵوێستێکی گەورەی بەرەنگاربوونەوەش دەکاتە ناچاری.

رەجەب تایب ئەردۆغان کە وەک دیکتاتۆرێکی سەردەمیانە هەڵدەسوڕێت، ئێستاکە لە هەنگاوناندایە بۆ ژیاندنەوەی هزری دەوڵەت نەتەوەگەریی توندتر لە رژێمی بەعسی ئێراق و سوریا، بە بەکارهێنانی ئاینی پیرۆزی ئیسلام لە پێناوی خۆیدا کە خۆی پێشەنگایەتی دەکات و هەروەها بە لوتکە گەیاندنی هزری فاشیزمی تورک کە MHP پێشەنگایەتی دەکات، دەیەوێت کۆتێزێک لە ئاینگەرایی – فاشیزم دروست بکات و بەمەش هیچ گەل، نەتەوە، ئایین، مەزهەب و هیچ کلتوورێکی تر نەبێت تەنانەت باس لە هەبوونی خۆی بکات. هەر هەڵگرێکی ئەم زیهنییەتەش، پێی رەوایە دەیان کۆمەڵکوژی بەسەر گەلاندا بهێنێت تا بگات بە ئامانجی فاشیستانە و خۆپەرستانەی خۆی.

لەم قۆناخەدا کە چارەنووسی گەلی کورد و گەلانی هەرێمەکە بەندە بە ئاستی تێکۆشان و خەباتییانەوە، بێگومان تەڤگەڕی ئازادی کورد و تێکۆشانی ئازادی و دیموکراسی لە باکوری کوردستان بە ئاستی بەرەنگاربوونەوەی سەرتاسەری شکاندنی هێزی فاشیزمی نەتەوەپەرست گەیشتووە و بە دروشمی ( مسۆگەر سەردەکەوین ) رێگەی سەرکەوتنی یەکجاری گرتۆتەبەر، بە دەیان شێوە و شێوازی رەوا لە چالاکی سیاسی، کۆمەڵایەتی و بەرگری گەوهەری و رەوا دایە. هەر ئەمەشە بۆتە هۆی ترساندنی فاشیست و هەڵگرانی ئاڵای فاشیزم بەتایبەت لە باکوری کوردستان و تورکیا تا بە هەموو شێوازێک پەلەقاژەی مەرگیان بگەیەنن بە؛ خۆگرتنەوە بە قڕکردنی گەلی کورد و گەلانی دیموکراسی و ئازادیخوازی هەرێمەکە. هەر بۆیە سەرکەوتنی تێکۆشانی ئازادی و دیموکراسی گەلان شکست و لەناوچوونی هزری فاشیزمی بەرهەمى سیستەمی سەرمایەداری لەگەڵدایە.

چالاکی مانگرتنی زیندانیانی سیاسیش وەک یەکێک لە بەهێزترین چالاکییەکانی دژ بەو سیاسەتە نەگریسانەیەی دەوڵەتی فاشیستی ئەردۆغان، ئەمڕۆکە بە ئاستێکی هەستیار گەیشتووە و چیتر نە ئەردۆغان و نە شوێنکەوتووەکانی ناوخۆی و دەرەوەی خۆیشی ناتوانن سەرکوت و حاشای لێ بکەن. وەکو هاوسەرۆکایەتی پارتی ژیانی ئازادی کوردستان PJAK لەکاتێکدا بە هەموو شێوازێک پشتیوانی لە چالاکی رەوای مانگرانی سیاسی و هەموو چالاکییەکی مەدەنی و رەوای پشتیوانیکردن لە مانگرتوان دەکەین، هاوکات دەوڵەتی فاشیستی تورکیش دەبێت باش بزانێت لە بەرامبەر بەرپرسیارێتییەکی زۆر قورسی مێژووییدایە و چیتر گەلی کورد و گەلانی ناوخۆی تورکیا وەک رابردوو بە سەبر و ئارامییەوە مامەڵەی لەگەڵ‌ ناکەن، ناچارە یەکێک لەو دوو ڕێگەیەی لەبەردەمیدایە هەڵبژێرێت، یان ئەوەتا بەرەو دیموکراسی راستەقینە و ئازادی گەلانی هەرێمەکە وەردەچەرخێت، وە یان ئەوەتا بەدەستی خۆی دەبێتە هۆکاری روخاندنی دەسەڵات و تەختی خۆی و لەناوبردنی خودی خۆی، کە ئەمەش دوور نییە قوربانییەکی زۆر گەورەی لێبکەوێتەوە و شەرمەزارییەکی گەورە و مێژوویی بۆ نەوەکانی دوای خۆی لە بەرامبەر بە گەلانی هەرێمەکە لەگەڵ‌ خۆی بهێنێت.

هەر بۆیە لەو چوارچێوەیەدا گەلی کورد لە هەر شوێنێکی هەرێمەکە و جیهان بێت، ناچارە بە چالاکی مەدەنی لە ئاستی لوتکەدا پشتیوانی لە مانگرتووانی سیاسی بکات، قفڵ و دەرگای بەندیخانەکان بشکێنێت و چارەنووسی خۆیان دیار بکەن. لێرەشەوە ئێمە وەکو PJAK بە هەموو شێوازێکی رەوا و دیموکراتی پشتیوانی لە چالاکی مانگرتووانی نێو بەندیخانە رەش و تاریکەکانی دەوڵەتی تورکی داگیرکەر و سەرجەم زیندانیانی سیاسی و داواکارییەکانیان دەکەین. هاوکات جێگەی خۆیەتی لێرەوە بێدەنگی هەموو پارتی و لایەنێکی کوردی کە بانگەشەی کوردایەتی دەکەین لەبەرامبەر بەو پیلان و هێرش و سیاسەتە قڕکارییانەی داگیرکەرانی کوردستان، بە توندی شەرمەزار دەکەین و دەڵێین: بێدەنگی مردنە و هاوکاریکردنی دوژمنانی سەرسەختی کورد و داگیرکەرانی کوردستانە.

بابەتی پەیوەندیدار