راگەیێنراوی كۆنگرەی نەتەوەیی كوردستان،  لە مەڕ ساڵوەگەری دامەزراندنی كۆماری كوردستان لە مەھاباد

راگەیێنراوی كۆنگرەی نەتەوەیی كوردستان، لە مەڕ ساڵوەگەری دامەزراندنی كۆماری كوردستان لە مەھاباد

گەلی كورد لە پرۆسەی بنیادنانی كوردستان خاوەن سەربوردەیەكی دەوڵەمەندە. لە درێژەی سەدان ساڵەوە ئەو ھەوڵانە بە دی دەكرێ. یەك لەوەقۆناغانە دامەزراندنی كۆماری كوردستانە لە مەھاباد.

رۆژی 22 . 01 . 1946 لە مەیدانی پیرۆزی چوارچرا ی مەھاباد، بە وتارە پڕ شكۆكەی پێشەوا قازی موحەمەد كۆماری كۆردستان ڕاگەیێنرا. كۆماری كوردستان لە مەھاباد لە نێو ھەلومەرجەكانی جەنگی دووەمی جیھان دا دامەزرێنرا.پێشەوا قازی وەكو سەرۆكی حوزبی دیموكراتی كوردستانی ئێران رۆل و ئیرادەی خۆی بەجێگەیاند و بووبە سەرۆك كۆمار.

پێشەوا قازی محەمەد لە راگەیاندنی كۆمار دا بە ئامادەبوونی سەدان ھەزار كەس لە مەیدانی چوارچرای مەھاباد كە بۆ كورد و ھەروەھا بۆ یارو نەیارانی كوردان بەڕاشكاوانە ووتی كە گەلی كورد وەكو ھەموو گەلانی تری دونیا، مافی ئەوەی ھەیە كە لەسەر ئەرز و خاكی خۆی خاوەنی قەدەری خۆی بێت. ھەروەھا ئەو رستەی كە ھەرە كاریگەربوو لە وتارەكەی دا باسی لێوە كرد كاتێك كە فەرمووی: – ” ئێستا كە كۆماری كوردستانی ئۆتۆنۆمی دامەزراوە” ئەو رستەیە لە مەیدانی چوارچرا و ھەروەھا لە سەرانسەری كوردستان دەنگیدایەوە. دامەزراندنی كۆماری كوردستان لە مەھاباد روداوێكی مێژوویی و بە دیھاتنی خەونی مێژینەی كوردان بوو. بەڵام بە داخەوە تەمەنی ئەو كۆمارە درێژەی نەكێشا و دوای ساڵێك ھەڵوەشایەوە. ھۆكارە ھەرە كاریگەر لە جوانەمەرگبوونی كۆمار، ناتەبایی و یەكنەبوونی ناوخۆیی و بەدبەختی دۆستان و ھەروەھا بارودۆخی بە كۆتاییھاتنی جەنگی دووەمی جیھانی بوو. ئەو كۆمارە بە لە سێدارەدانی پێشەوا و ھەڤاڵانی لە مەیدانی چوارچرای مەھاباد تێكچوو و روخا.

تراژیدیای ھەڵوەشانی كۆماری كوردستان لە مەھاباد لە ھەموو لایەك و تایبەتمەندیەكانی خۆی واتادارە. ئەمڕۆ كورد لە بەشی باشوور خاوەنی خۆسەری و حكومەت و پەڕلەمانی خۆیانن. لە رۆژاوای وڵات پرۆسەی دامەزراندنی خۆسەری ھەیە. لە باكوری كوردستانیش تێكۆشانێكی ئومێدبەخش دەدرێ و دەستكەوتی گرنگ ھاتۆونەتە دەست.

تێكۆشانی ئازادیخوازانەی رۆژھەڵاتی كوردستانیش، بە خوڕ لە ئارادایە. دۆزی گەلی كورد و كوردستان گەیشتۆتە قۆناغێكی پێشكەتوو و وشیاری نەتەوەیی لە بەرزبوونەوە دایە. بارو دۆخی نێونەتەوەیی لە گەڵ لایەنی كوردان دایە. بەڵام لەگەڵ ئەوەش دا دەستھەڵاتی خوەسەری باشوور، بەرەو دامەزراندنی خۆبەڕێوەبەری لە رۆژاوا، ھەوڵ و پرۆسەی چارەسەری لە باكور و ھەوڵەكانی رۆژھەڵاتی كوردستان، بە گشتی لە ژێر گەرەنتیەكی رەھا دا نین. گەرەنتی گەورەو بە ھێز یەكێتی و یەكڕیزی پتەوی ناوخۆیی یە. كورد و كوردستانی تاوەكو یەكێتی ناوەخۆیی پێكنەھێنن، ھێزو توانایان لە سەر بنەمای بەرژەوەندی نەتەوەیی و نیشتیمانی یەكنەخەن، ناتوانن و ئەستەمیشە بتوانرێ ئەو دەستكەوتانە بە شێوەیەكی تەندروست بپارێزن.

لە ساڵوەگەری ئەمساڵی دامەزراندنی كۆماری كوردستان لە مەھاباد، وانەو ئەركی ھەرە گەورە، رێككەوتن و یەكگرتنی ناوخۆیی كوردستانیانە. بە تایبەتی ھێزە كوردو كوردستانیەكانی رۆژھەڵاتی كوردستان، پێویستە ئەو دەرسەی كە بۆتە زەرورەتێكی بێ بەدیلی بەردەوامبوون لە خەبات و گەیشتن بە ئامانجە رەواكان. ئەویش یەكتری قەبوڵكردن و رێككەوتنی ناوخۆیی نێوان ھێزە سیاسیەكانی ئەو بەشە. بە جۆرێك ریزگرتن لە مێژووی خەباتی گەلی كوردی رۆژھەڵات بە سوود وەرگرتن لە دەرس و عیبرەتی دامەزراندن و دواتر لە تێكچوون و روخانی كۆماری جوانە مەرگی كوردستان لە مەھاباد. بۆیە كاری سەرەكی و بە پەلەی دینامیكی نەتەوەیی و نیشتیمانی لە رۆژھەڵاتی كوردستان دروستبوونی یەكێتی نەتەوەیی یەو پێویستە ئەو پرسە دا خاوەن پلان و پرۆگرام بن و بە زووترین كات ھەنگاوی پراكتیكی كردارەكی بۆ بنرێت.

كۆنگرەی نەتەوەیی كوردستان – كنك، وەكو ھەموو جارێك گرنگی یەكی گەورە بە یەكێتی نەتەوەیی ی رۆژھەڵات و لە ھەر بۆنەیەك دا راسپاردەی ھەموو ھێزە كانی رۆژھەڵاتی كوردستان دەكات كە ئەو ئەركەی خۆیان دوانەخەن و جێبەجێیكەن. بۆ ئەم ئامانجە و مەبەستە لە وڵات و دەرەوەی وڵات كۆڕ و كۆ بوونەوە دەكرێن.

كۆنگرەی نەتەوەیی كوردستان ھەوڵ دەدات لەسەر پرسی رۆژھەڵاتی كوردستان كۆڕبەندی راوێژی نەتەوەیی و نیشتیمانی پێكبێنێت بۆ مەبەستی یەكێتی ناوخۆیی كە لە ئەنجامیدا دەرھاویشتەو دەستكەوتێكی خێرداری لێبكەوێتەوە.

لە رۆژی ئەمڕۆدا، كە بیرەوەری راگەیاندنی كۆماری كوردستانە لە مەھاباد، بە پێویستی دەزانین كە بە پەلە و بو ھەوڵ و خەباتی گشت لایەن لە پێناویدا كاربكرێت بۆ ھینانەكایەوەی ئیتیفاقێكی ناوخۆیی و دامەزراندنی یەكێتیەكی نەتەوەیی و نیشتیمانی كوردستانی.

 

كۆنسەی بەڕێوەبەری كۆنگرەی نەتەوەیی كوردستان — KNK
22.01.2014 برۆكسل

بابەتی پەیوەندیدار