Esas slogana jin, jiyan, azadî koka xwe ji zanista jineolojî tê
Esas slogana jin, jiyan, azadî koka xwe ji zanista jineolojî tê

Esas slogana jin, jiyan, azadî koka xwe ji zanista jineolojî tê

Zîlan Vejîn

Teror kirina Nagîhan Selakar êş û xemgîniyek mezin di dilê me hemû jinan de ava kir û em bi hêrsek mezin hêzên ku vê terorê pêkanîn, şermezar dikin. Bi taybet wekî jinên Rojhilat, piştî têkoşîn, ked, xebat û ev çend berdêlên giran ên bi dehan salan bi felsefeya jin, jiyan, azadî hatin dayîn, em ketin pêvajoya nû a şoreşa azadiya jin li Îran û Rojhilatê Kurdistanê. Bi qetla Jîna, sebra jinan êdî li hember bend û zincîrên ku li beden, rih û mejiyên wan hatî gerandin, nema. Jinan wan bendan qetandin û qîrên azadiyê di her kolanekê de bilind kirin. Qetla rêhevala me Nagîhan, ji aliyê xwediyên heman zihniyeta desthilatdariya mêrsalar ku Şilêr û Jîna qetil kir, pêk hat. Ji bo ku çavên jina bitirsînin û têkoşîn û çalakiyên jinan lewaz bikin, navenda jin a zanistî û bîrdozî di şexsê Nagihan de hedef girtin. Ev qetil, bi feraset û armanca ku rojeva jin a şoreşa azadiyê biguherin pêk hat. Hemû rojeva jinan û a cîhanê niha bûye jin, jiyan, azadî. Hemû xebata jinan bûye çalakî û serhildan. Êdî jin ne li mal in, li qadan in û ji bo azadiyê diqîrin. Ev rewş, di şexsê rejîma jinkuj a Îranê de hemû rejîmên dewletî xistiye nav tirs û lerzekî. Pergala ku li ser tunekirina jinan ava kiribû êdî nema. Jinan ev berdêl dane berçav û  soz dane ku wê bi hêz, bawerî, vîn û hevgirtina xwe, pergalê qebûl nekin û guhertinê ferz dikin. Gotina zihniyeta mêr a ku digot, erd û ezman bibin yek jin nabin yek, li hember sekna jinên wekî Şilêr, Jîna û Nagîhanan û xwedîderketina li vê seknê ji aliyê hemû jinên Kurdistanê, Rojhilata Navîn û ji vir ve jî cîhanê, bi slogana jin, jiyan, azadî, hevgirtinekî gerdûnî da nîşandan û gotin û pênaseyên ku ji dîrokê heta niha ji bo jinê hatine ferz kirin, vala derxist.

Esas slogana jin, jiyan, azadî koka xwe ji zanista jineolojî tê û rêhevala me Nagîhan, di hemû qadan de vê zanebûna jin belav dikir. Ên ku ev êriş pêkanîn û hevkarên êrîşê, ji ber tirsa hilweşîna sîstema xwe a desthilatperest ev pêkanîn. Jiber navenda jin, jiyan, azadî zanista jin û jineolojî ye. Jineolojî bi vê sloganê îfadeya xwe di jiyan, têkoşîn û çalakiyên hemû jinan de dibîne û asta xwe nasîn û di ferqa hebûna xwe de bûyîna jinan, dide nîşandan. Heval Nagîhan jî pêşengtiya wê teorî û zanistê dikir, ji bo di kesayeta jinan de jiyanî bike hemû jiyan û dema xwe ji bo vê razand. Jiber vê, ev qetlekî siyasî ye û di vê pêvajoyê de pêkanîna wê jî, peyama hêzên jinkuj û desthilatdare. Peyama me jî bi zanista jineolojî xwe rêxistin kirin, xwebûna xwe qezenc kirin û felsefeya jin, jiyan, azadî kirina çalakiya bersiv û tola herî mezin ji dîroka koletiyê.

Berxwedaniya ku Zarîfe û Sakîne Cansizan li Bakur, Leyla Qasiman û Viyan Soranan li Başur, Şîrîn Elemhulî û Zîlan Pepuleyan li Rojhilat, rehê xwe berdaye vê axê û niha jî şax dide li herderê Kurdistan û cîhanê. Helbet tenê jinên Kurd berdêl nedane, di hemû şoreşên cîhanê de jinan pir berdêl dane, lê negihîştine azadî û mafên xwe. Têkoşîn berdewam dike û jinên Kurd berdêlan didin, evçend destkeftiyan ava dikin û gavên nu di pêşketina şoreşa jinan de didin ava kirin. Nasnameya jina azad li ser bîrdoziya rizgariya jin derxiste asta herî pêş.

 Şoreşger, akademîsyen û têkoşerên wekî Nagîhan, ji bo têkoşîna azadiya jinan û doza gelê Kurd bê rawestandin û westandin kêlî bi kêlî cih girt û xizmet kir. Rêhevala me bi salan bû di xebata Jineolojî de cih girt û di hemû beşên Kurdistinê de xwedî ked û berhem bû. Eger îro hemû jinên Kurd û neteweyên din ên Îranî bi hevre yek sloganê  diqîrin, çavkaniya xwe ji têkoşînvanên mîna Nagîhanan digire. Bi dehan jinên Rojhilatê Kurdistanê perwerde kiriye û bi sedan û hezaran jinên Îranî ji berhemên wê sûdwergirtin û xwe perwerde kirin. Dema Şîrîn Elemhulî çû ber sêdarê, girêdan û hezkirina xwe ji jiyanê qut nekir û dema ku Zîlan Pepule bi birîndarî bi duv panzêrê ve girêdan û di nav kolanên Merîwanê de xirikandin dîsa teslîmyet qebûl nekir. Jinên Rojhilat ev ji bîr nekirin û weke hêrs di dil û mejiyên xwe de girtin û bi vê îradeya bêhempa daketine qadan. Pêwîste qetla heval Nagîhan ji bo jinên Başur jî bibe çirûska tolhildan û hesabpirsînê.  Mîna ku xwedîderketina Jîna li Rojhilat  çêbû, û herwiha ji bo her jinekê, li kuderê dibe bila bibe, xwedîderketin çêbibe jiber ku serkeftina şoreşê bi pêşengtiya jinên ku xwedî li hebûna xwe û mirovatî derdikevin misoger dibe. Emê bi hêvî,  azwerî, çoş û baweriya Rêhevala xwe Nagîhan a jiyan û hevaltiya mezin jiyan bikin, têkoşîn bikin û xeyal û armancên jina şoreşger, bi şoreşa azadiya jinan tacîdar bikin. Bersiva me a herî mezin ji bo dijmin, neyar û zihniyeta jinkuj re jî wê ev be. Li ser esasê kampanya ku KJAR destpê kiriye emê di şexsê Şilêr Resulî û Jîna Emînî de, ruhê serhildêr ê ji bo şoreşa jin pêşketiye, bi zanista jineolojiyê şoreşa jinê biparêzin û xwedî li têkoşîna 30 salan a Hevala Nagîhan derkevin.

بابەتی پەیوەندیدار